అమ్రాబాద్, వెలుగు: శ్రీశైలం ఘాట్ రోడ్డులో శుక్రవారం రాత్రి మినీ ట్రావెల్స్ వాహనం, ఆర్టీసీ బస్సు ఢీకొన్న ఘటనలో ఒకరికి తీవ్ర గాయాలు కాగా మరో 18 మందికి స్వల్ప గాయాలయ్యాయి. బాధితుల వివరాల ప్రకారం, హైదరాబాద్ ఘట్కేసర్ ప్రాంతానికి చెందిన కుటుంబ సభ్యులు దైవ దర్శనం కోసం మైసిగండి, మద్దిమడుగు దేవాలయాలకు వెళ్లి అక్కడి నుంచి శ్రీశైలం బయలుదేరారు.
వరవర్లపల్లి సమీపంలోని రాసుమల్ల బాబి వద్ద ఎదురుగా వస్తున్న మహబూబ్నగర్ డిపోకు చెందిన ఆర్టీసీ బస్సు ఢీకొట్టింది. ఈ ప్రమాదంలో లక్ష్మయ్య అనే వ్యక్తికి తీవ్ర గాయాలయ్యాయి. మరో 18 మందికి స్వల్ప గాయాలయ్యాయి. క్షతగాత్రులను అచ్చంపేట ప్రభుత్వ దవాఖానకు తరలించి చికిత్స అందించారు. ఘటనపై కేసు దర్యాప్తు చేస్తున్నట్లు పోలీసులు తెలిపారు.
